حريق الفيحا....!!!..Fire in Fiha

السلام عليكم...
طبعا اكثركم شاف او سمع عن الحريق اللي صار بالفيحا ....
اللي عرفته ان محول كهربه احترق ( طبعا مادري ليش احترق يمكن نوعيته الطيبه).. بس الشرطه والاطفاء ما قصروا الله يجازيهم خير.
والشعب الكويتي الطيب ما قصر ... الفيحا صارت زحمه من الناس الملقوفه :) بس نسوي هذي من صفات شعبنا الغالي :P
المهم الحريق كان كبير يعين انا بالخالديه و كانت الغيمه السوده فووقنا ....
اخليكم مع الصور اللي خذيتها من الخالديه

و هالصوره من داخل الفيحا من احد الناس اللي يصيرون لي...

وها قد اصبح بطلاً...خالد الطاحوس..و امن الدوله

بسم الله الرحمن الرحيم

اللي كنت خايف منه صار... واللي كان خايفين من وايد من الناس صار....

اليوم اكثركم قريتوا بالجرايد اطلاق سراح خالد الطاحوس من امن الدوله ....

لكن اول شي تعرفون ليش خذوه؟؟

السبب ان في احد ندواته الانتخابيه قال كلام ما ينقال بأختصار

قال :مستعدين ولدنيا مجاميع في كل المناطق على اهبه الاستعداد للتحرك اذا تهورت السلطه في استخدام اي امر ضد ابناء القبائل....

شنو قصده؟؟...

قصده ان عنده قوه للتحرك ضد الحكومه اذا اتخذت شي ما يعجبه !!!

وين قاعدين؟؟؟ ب غابه؟؟؟

يعني مثلا بيتقولون هذي ديموقراطيه؟ اذا ديموقراطيه فهل في مره سمعتوا رئيس ولايه في امريكا يقول خطاب ان بيمع سكان ولايته وبيحاوطون واشنطن اذا اوباما قال قرار مو بمصلحتهم؟؟؟

لا محد سمع ولا بيسمع هالكلام .. لان هالشي اسمه تمرد مو ديموقراطيه...الديموقراطيه لها حدود واذا تعدت هالحدود تسمى تجاوز .

خلونا من هذا كله ...

المشكله الكبرى ان اليوم قريت خبر ان خالد الطاحوس فاز بالانتخابات الفرعيه للعجمان ...يعني الريال صار بطل وطني بعيون ابناء قبليته...

اللي يغلط و يدعوا للمشاجرات يسمى بطل!!

اللي يهدد الحكومه يسمى بطل!!!

ما اقول الا حسبي الله ونعم الوكيل الله يهدي الجميع و الله يستر من المجلس الياي اذا هالناس بتدخل هالمجلس...

-----------------------------------------------------------

س.شرايكم باللي قاعد يصير من تدخلات امن الدول واعتقلاهم لبعض المرشحين؟ مع او ضد؟

سلام :)

مصر ... الفلبين .. والان الهند !!

بسم الله الرحمن الرحيم

الموضوع عن الجامعات الخاصه...

كلكم تذكرون الهبه اللي صارت و اهيه .. كلما تسال واحد يقول انا ادرس بمصر بجامعه المعادي !!
ليش جامعه المعادي؟
لانها تعطيك من الاخر ... تعطيك الشهاده وانت مرتاح..

اما الحين الجامعه وقفوا عنها الاعتراف ...لكن لما الحين في جامعات الوضع مصخره .. مثلا سألت واحد من الشباب شنو المصخره اللي هناك ؟ قالي بالضبط .. تداوم اسبوعين بالسنه وبهالاسبوعين تقعد تدقدق عالمدرسين ويسوون لك براشيم وتدش فيهم ...!!

خلونا من مصر ...

الفلبين .. اعتقد توهم وقفوا الاعتراف لكن خنقولكم شصاير هناك ... اعرف همن اكثر من شخص يدرسون هناك ويدرسون هندسه يعني مو شي سهل ... واللي قاعد اشوفه انها بالكورس يداومون اسبوعين,, يروحون بس عشان يمتحنون وطبعا الامتحان كله اسئله موضوعيه وكل الاجوبه عندهم ...(هندسه وكلها موضوعي شلون صارت مادري ).. يعني نطروا 3 سنين بالكثير وتتخرج الدفعه الاولى من المهندسين اللي بيطورون ديرتكم ...


الهند.... الهند هبه يديده و وايد وايد شباب اعرفهم راحوا الهند ... يقولون الوضع مو صج!! ليش مو صج؟؟؟

موصج لان اشكره ماكو دراسه ... يعني جم واحد من الشباب اختفوا عن الديوانيه اسبوعين لما ردوا قلنا لهم ها وينكم ماتبيون ؟
جان يقولون والله كنا مسافرين الهندس ,, وخلصنا سنه دراسيه ب اسبوعين وردينا !!

شلون خلصتوا؟ ...

ماكو والله رحنا قعدنا بمنتجع واستانسنا و رحنا يومين عشان نسجل اسامينا حق الامتحانات وبس..

وانشالله كل سنه بنروح اسبوعين تغيير جو ومنها ناخذ شهاده...


اللي بقوله...

اللي بالكويت او بأي ديره تلقاه يتعب وينكرف واخر شي يشوف صاحبه اللي بره ياخذ الشهاده بسهاله ...

يعني مادري هل نروح وراهم ونرتاح؟ او نقعد ونتعب واخر شي تلقا بو الهند و بو الفلبين يمك ..

سوري عالطواله ... سلام :)